काठमाडौं । नेपाली राष्ट्रिय क्रिकेट टोलीको एकदिवसीय कप्तानको जिम्मेवारी फेरि सन्दीप लामिछानेको काँधमा आएको छ। नेपाल क्रिकेट संघ (क्यान) ले सोमबार रोहित पौडेललाई हटाउँदै सन्दीपलाई नयाँ कप्तान नियुक्त गरेको हो।
क्यानका सचिव पारस खड्काका अनुसार आगामी अगस्ट ३० देखि सेप्टेम्बर १२ सम्म मलेसियामा हुने एसीसी प्रिमियर कपदेखि सन्दीपले एकदिवसीय टोलीको नेतृत्व गर्नेछन्। प्रतियोगिताका लागि क्यानले सन्दीपको कप्तानीमा १४ सदस्यीय टोलीसमेत घोषणा गरेको छ।
टोलीमा आसिफ शेख, अर्जुन कुमाल, रोहित पौडेल, देव खनाल, दीपेन्द्रसिंह ऐरी, बसिर अहमद, इशान पाण्डे, गुलसन झा, शेर मल्ल, ललित राजवंशी, करण केसी, हेमन्त धामी, सन्दीप जोरा र सन्दीप लामिछाने छन्। नियमित सदस्य कुशल भुर्तेल र सोमपाल कामी भने टोलीमा परेका छैनन्।
सन्दीपले यसअघि सन् २०२१ मा पहिलोपटक नेपाली राष्ट्रिय टोलीको कप्तानी सम्हालेका थिए। त्यतिबेला ज्ञानेन्द्र मल्ललाई हटाउँदै उनलाई कप्तान बनाइएको थियो। उनले एकदिवसीय र टी–२० दुवै प्रारूपमा नेपालको नेतृत्व गरेका थिए।
एकदिवसीयतर्फ सन्दीपले १४ खेलमा कप्तानी गर्दा नेपालले चार खेल जितेको, नौ खेल हारेको र एक खेल बराबरी गरेको थियो। टी–२० अन्तर्राष्ट्रियमा भने उनको कप्तानीमा नेपालले १८ मध्ये १३ खेल जितेको थियो।
सन् २०२२ मा कानुनी विवादपछि क्यानले सन्दीपलाई निलम्बन गरेपछि रोहित पौडेललाई कप्तान बनाइएको थियो। त्यसपछि रोहितले चार वर्ष नेपाली टोलीको नेतृत्व गरे।
रोहितको कप्तानीमा नेपालले ५५ एकदिवसीय खेल खेल्दा २८ खेलमा जित हासिल गरेको थियो। तर आईसीसी विश्वकप लिग–२ मा नेपालको कमजोर प्रदर्शनपछि क्यानले एकदिवसीय कप्तान परिवर्तन गरेको हो।
यसअघि क्यानले दीपेन्द्रसिंह ऐरीलाई टी–२० टोलीको कप्तान नियुक्त गरिसकेको छ। सन्दीपको पुनरागमनसँगै नेपाली एकदिवसीय टोलीको रणनीति र नेतृत्व शैलीमा समेत परिवर्तन आउने अपेक्षा गरिएको छ।