माधवलाई झलनाथको प्रश्न– पार्टी फुटाएर माओवादीमा मिसिन तपाईंलाई सुहाउँछ?

१३ कात्तिक, काठमाडौं। नेकपा एकीकृत समाजवादीका सम्मानित नेता झलनाथ खनालले माओवादी केन्द्रसँग अहिले एकता भन्नु विसर्जनको यात्रा हुने बताएका छन्।

जारी केन्द्रीय कमिटी बैठकमा पूर्वप्रधानमन्त्री खनालले पार्टीलाई विसर्जन गर्ने गल्ती नगर्न आग्रह गरे। ‘हिजो कांग्रेसतिर लागेर दक्षिणपन्थी भड्कावलाई साथ दिन पुग्यौं। अहिले पार्टी कमजोर भयो भन्दैमा माओवादीतिर मिसिनु विसर्जन हो,’ खनालले भनेका छन्।

अध्यक्ष माधवकुमार नेपाललाई हतारमा माओवादीसँग एकता नगर्न खनालले आग्रह गरे। ‘पार्टी कार्यालय चलाउन सकिएन, कार्यकर्ता पनि धेरै भएन, भोट आएन भन्दैमा कुनै पार्टीमा मिसिन विर्सजन हो,’ उनले भने।

अहिले माओवादीसँग एकता गर्ने निर्णयले एकीकृत समाजवादी एकताबद्ध नरहने पनि खनालले बताए। ‘पार्टी फुटाएर माओवादीमा मिसिन तपाईंलाई सुहाउँछ,’ खनालले प्रश्न गरेका थिए।

खनालले मागे राजीनामा

सम्बोधनकै क्रममा पूर्वप्रधानमन्त्री खनालले माधव नेपालको राजीनामा मागे। भ्रष्टाचार आरोपको मुद्दा लाग्नासाथ राजीनामा दिनु राम्रो हुने सुझाव पहिले दिएको सम्झँदै खनालले भने, ‘यो बैठकबाट पनि भन्छु– तपाईंले राजीनामा दिनुस्।’

सांसद् र संसदीय दलको नेता हुन नमिल्ने नेताले पार्टीको नेतृत्व गरिरहन नसुहाउने तर्क खनालले गरेका थिए।