हालको आर्थिक वर्षको पछिल्ला चार महिनामा शुक्लाफाँटा नगरपालिका–१० झलारीस्थित आयुर्वेद औषधालयबाट १,५२२ जनाले निःशुल्क सेवा लिएका छन्।

गत वर्षको अक्टोबर महिनामा मात्र ३४२ जनाले निःशुल्क औषधिसहित उपचार सेवा लिएका थिए। आयुर्वेद औषधालयले ३० प्रकारका रोगका लागि औषधि प्रदान गर्दै आएको कविराज जयाराम शाहले जानकारी दिए। उनले कोराना महामारीपछि आयुर्वेद औषधिको प्रयोग गर्ने बिरामीको संख्या दिनप्रतिदिन बढ्दै गएको बताए।

“स्वास्थ्य अभिवृद्धि गर्ने र रोग प्रतिरोधात्मक औषधिहरूको माग बढ्दै गएको छ,” उनले भने।

उनका अनुसार कोरोनाको संक्रमण फैलिनु अघिसम्म थोरै मात्र बिरामी आयुर्वेद औषधालयमा उपचारका लागि आउने गर्थे। “अब बिरामीहरूले आयुर्वेद औषधिको महत्व बुझ्न थालेपछि औषधि पाउन गाह्रो हुँदै गएको छ,” कविराज शाहले भने। एकमात्र सरकारी आयुर्वेद औषधालय तथा उपचार केन्द्र भएकाले बिरामीको चाप पनि बढेको उनले बताए।

उनका अनुसार २०७७ साल असार मसान्तसम्ममा ४,४७६ जनाले सो औषधालयबाट सेवा लिएका छन्। तीमध्ये १,३८४ जनाले गाठा–बाथाका लागि, ७४८ जनाले अम्लपित्तका लागि, ४३७ जनाले श्वासप्रश्वास सम्बन्धी रोगका लागि, २१५ जनाले संवेदनशून्यताको लागि, ११३ जनाले स्त्रीरोगका लागि र २५६ जनाले पेटसम्बन्धी रोग (ग्यास्ट्रोएन्टराइटिस) को लागि सेवा लिएका छन्।

यी रोगहरूमा ज्वरो, श्वासप्रश्वास समस्या, झाडापखाला, सुजाक, पीलिया, मुटुरोग, उच्च रक्तचाप, सूजन, कृमि, चर्मरोग (सोरायसिस), चोटपटक, गाठागाँठो, रक्तस्राव, पिसाबको समस्या, प्रसूति सम्बन्धी रोग, आँखाको रोग, कान, नशा, मुख, दाँत, घाँटीसम्बन्धी रोग, टाउको दुख्ने, बालरोग तथा स्त्रीरोगका बिरामीहरूले समेत सो औषधालयबाट लाभ लिएका छन्।